Die son sal weer skyn

In watter seisoen van jou lewe is jy?

Ons kan maklik so verstrik raak in die idee dat geloof net om “joy” gaan. Veral op geestelike tienerkampe word daar gewoonlik ‘n geestelike hoogtepunt bereik waar daar dan gedink word dat Christenskap net oor ewigdurende blydskap en vreugde en voorspoed gaan. Maar soos wat jy ouer word en verskillende hoofstukke in jou lewe betree, gebeur daar dalk ‘n paar goed in jou lewe wat jou laat wonder: Waar is God dan nou?

Ons almal het geestelike seisoene in ons lewe. Ons ervaar sekere seisoene meer kere as ander, maar ons almal gaan iewers in ons lewe een of ander seisoen. Prediker sê in sy boek dat daar ‘n tyd vir alles is en juis daarom is dit belangrik om in die seisoen waarin jy jouself tans bevind, steeds voluit te leef en te volhard is geloof.

Dalk is jy in die somer van jou lewe. Dalk is al jou werk op datum, jou verhoudings goed op dreef en jou geldsake in orde. ‘Kyk of jy vir my die son kan vang…’ Die lirieke uit die lied, Sonvanger, laat dink my aan die somer.

Somer is oestyd. Tyd om die opbrengs te bêre in die spens. Tyd om seëninge te koester en wysheid te bekom; tyd vir opgaar en vir voorsiening maak. Somer is piekniek vir jou siel en strale in jou hart. Hierdie is ‘n tyd om te huppel en sing, te lag en baljaar. Te dans op die wonderlike lied van die lewe. Somer is die tyd om op jou knieë te gaan, en die Vader te dank, en dis ook die tyd om op jou knieë te blý, want winter, die gaan wel nog kom.

Is dit dalk vandag winter in jou lewe? Somtyds is die winter rondom jou, ander kere trek winter sommer binne in jou in. Is jy dalk in ’n moeilike fase van baie wanhoop en teleurstellings? Dalk is jy in ‘n koue seisoen van jou lewe, waar die kaggel nie meer warm maak nie en die somer-swaeltjies nie meer terugkeer nie. Is hierdie dalk jou stil-seisoen? Jou alleenpad wat lank en steil is? Dit is ‘n tyd waar niks regtig wil uitwerk nie en dit voel asof jy vrugteloos is vir God. Dalk wens jy hierdie fase in jou lewe verby en dalk is jou dae meer donker as lig. In hierdie wintertyd kyk jy dalk terug oor jou lewenspad en wonder waarheen die tyd gevlieg het. Of dalk kyk jy terug en is jy spyt oor ‘n klomp foute wat jy gemaak het. Wanneer die winterseisoen diep in ons binneste aanbreek, is dit belangrik dat ons moet onthou dat selfs die moeilike fases in ons lewe in Sy hand is – júís in Sy hand is. Ons moet weet dat Hy ons deur hierdie winterseisoen sal dra, en dat ons daarna selfs sterker en wyser sal wees as van tevore. Winter is ‘n tyd in jou lewe waar innerlike groei plaasvind. Die einde van een seisoen bepaal die begin van die volgende seisoen. En sodra die lente se eerste bloeisels aan die bome verskyn en jy die skoenlappers sien vlieg, sal jy weet dis weer lente in jou lewe.

Hier is ’n teks in die Bybel wat ons help met moeilike tye:

Romeine 5:3-5
‘Dit is egter nie al nie. Ons verheug ons ook in die swaarkry, want ons weet: swaarkry kweek volharding, en volharding kweek egtheid van geloof, en egtheid van geloof kweek hoop; en dié hoop beskaam nie, want God het sy liefde in ons harte uitgestort deur die Heilige Gees wat Hy aan ons gegee het.’

 

Swaarkry kweek volharding en volharding kweek egtheid van geloof en egtheid van geloof kweek hoop.  So waar wil die Here ons uitbring in ons swaarkry?  By die hoop; die somer in ons lewe.

Waar ek myself ook al in my lewe bevind, in die swaarste of ligste tye van my lewe, weet ek altyd:

“This, too, shall pass”.

Jou storie is nog nie klaar nie. Die verhaal van jou lewe is dalk tans by ʼn antiklimaks of ʼn doodloopstraat. Troos jouself in die feit dat jou verhaal nog nie klaar is nie. Dit kan nie heeljaar winter wees nie, ook nie heeljaar somer nie. Die probleme en seer waarmee jy tans gekonfronteer word, sal binnekort plek maak vir die nuwe seisoen in jou lewe. Vertrou God met ʼn positiewe gees. Jou tydperk om te blom sal weer kom! Weet ook dat God jou nie in die nuwe seisoen sal laat ingaan as jy nie gegroei het in genade, lankmoedigheid en sagmoedigheid nie. Jy moet eers groei (Efesiërs 4:22).

God berei ons juis in die windermaande voor vir die somers in ons lewe. Leef dus voluit in hierdie seisoen van jou lewe en weet:

Die son sal weer skyn.

 

cropped-beach-salt-water-sand-177271.jpg

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

Blog at WordPress.com.

Up ↑

%d bloggers like this: